İstifadə Şərtləri

Son yenilənmə: 6 oktyabr 2026

Bu şərtlər Petekh (petekh.com və Petekh tətbiqi) ilə siz arasındakı qaydalardır. Platformanı fərdi sahibkar Nahid Quliyev idarə edir. Mətndə «biz» dedikdə onu nəzərdə tuturuq. Hesab açmaqla, sifariş verməklə və ya elan yerləşdirməklə bu şərtləri qəbul edirsiniz. Qəbul etmirsinizsə, xahiş edirik platformadan istifadə etməyin.

1. Petekh nədir

Petekh Bakı və Sumqayıtda ev heyvanı sahiblərini zoomarketlərlə və baytarlarla birləşdirən onlayn platformadır. Məhsulları mağazalar (satıcılar) satır. Biz sifarişi qəbul edir, mağazaya ötürür və çatdırılmanı təşkil edirik. Alqı-satqı müqaviləsi sizinlə məhsulu satan mağaza arasında bağlanır. Məhsulun pulunu mağazanın adından və onun tapşırığı ilə biz qəbul edirik və mağazaya ötürürük. Çatdırılma haqqı Petekh-in xidmət haqqıdır.

2. Hesab

• Hesab açmaq üçün 18 yaşınız tamam olmalıdır.
• Qeydiyyatda düzgün telefon nömrəsi və e-poçt yazın. Bir nömrəyə bir hesab açılır.
• Parolunuzu heç kimə verməyin. Hesabınızla edilən hərəkətlərə görə siz cavabdehsiniz.
• Hesabınızdan başqasının istifadə etdiyini düşünürsünüzsə, dərhal bizə yazın.

3. Sifariş

• Məhsulun qiymətini və stokunu mağaza müəyyən edir. Səbətdə gördüyünüz qiymət sifarişi təsdiqlədiyiniz anda qüvvədə olan qiymətdir.
• Sifarişi təsdiqləməzdən əvvəl ekranda məhsulların cəmi, çatdırılma haqqı, endirimlər və yekun məbləğ göstərilir. Minimum sifariş məbləği də orada yazılır.
• Məhsulların qiyməti yekun qiymətdir: satıcıya aid vergilər (satıcı ƏDV ödəyicisidirsə, ƏDV də) qiymətə daxildir, üstünə ayrıca vergi gəlmir. Çatdırılma haqqı məhsulun qiymətinə daxil deyil — səbətdə ayrıca sətirdə, məbləği ilə göstərilir.
• Bir sifarişə yalnız bir mağazanın məhsulları daxil ola bilər. Başqa mağazadan almaq üçün ayrıca sifariş verin.
• Məhsul bitibsə və ya qiymətdə açıq-aşkar səhv varsa, mağaza sifarişi qəbul etməyə bilər. Bu halda sizə xəbər veririk və ödəniş alınmır.

4. Ödəniş və çek

Hazırda ödəniş qapıda edilir: sifariş çatdırılanda kuryerə nağd və ya kartla. Onlayn kartla ödəniş qoşulanda kart məlumatlarınız lisenziyalı ödəniş təşkilatında emal olunacaq. Kart nömrəniz Petekh-də saxlanılmayacaq.

Çek və məlumat qəbzi

• Malın fiskal (e-kassa) çekini onu satan mağaza verir və sifarişlə birlikdə paketin içinə qoyur. Çekin verilməsinə və düzgünlüyünə mağaza cavabdehdir.
• Petekh hər sifariş üçün «Sifarişlərim» bölməsində məlumat qəbzi göstərir: satıcı mağaza (rəsmi adı, VÖEN-i və ünvanı ilə), məhsullar, endirim, çatdırılma haqqı, yekun məbləğ və ödəniş üsulu. Məlumat qəbzi fiskal çek deyil.
• Kartla onlayn ödənişin bank qəbzini ödəniş təşkilatı ayrıca verir.
• Məhsul qaytarılanda fiskal «geri qaytarma» çekini də mağaza rəsmiləşdirir.
• Paketdə fiskal çek yoxdursa, bizə yazın — onu mağazadan tələb edirik.

5. Çatdırılma

• Çatdırılma Bakı və Sumqayıt ərazisində aparılır. Çatdırılma günü və saat aralığı sifariş zamanı ekranda göstərilir.
• Çatdırılma haqqı ünvanınızın zonasına görə hesablanır və sifarişdən əvvəl göstərilir.
• Kuryer gələndə məhsulu yoxlayın. Qablaşdırma zədəlidirsə, məhsul səhvdir və ya qüsurludursa, onu qəbul etməyə bilərsiniz.
• Göstərdiyiniz ünvanda və nömrədə sizə çatmaq mümkün olmasa, sifariş çatdırılmamış sayılır.

6. Ləğv, qaytarma və pulun geri verilməsi

Alış-verişinizdən razı qalmağınızı istəyirik. Fikrinizi dəyişmisinizsə, məhsulu qaytara bilərsiniz — sadəcə aşağıdakı şərtlərə əməl edin. Bu şərtlər hamı üçün eynidir və başqa müştərilərin təhlükəsizliyi üçündür: qaytarılan məhsul yenidən satışa çıxır.

Vacib: məhsulu hansı səbəbdən qaytarmağınızdan asılı olmayaraq, geri aparmanın kuryer haqqını siz ödəyirsiniz. Bu qayda bütün qaytarma hallarına aiddir.

Təhvil almadan əvvəl

• Sifarişi sizə təhvil verilənə qədər «Sifarişlərim» bölməsindən pulsuz ləğv edə bilərsiniz.
• Kuryer gələndə paketi yoxlayın, yem və digər istehlak məhsullarında son istifadə tarixinə baxın. Qüsur, səhv məhsul, zədə və ya vaxtı keçmiş məhsul görsəniz, məhsulu qəbul etməyin — onun pulu alınmır.

14 gün ərzində qaytarma

Keyfiyyətli məhsulu təhvil aldığınız gündən 14 gün ərzində qaytara bilərsiniz, əgər:

• məhsul istifadə olunmayıb, yuyulmayıb, üzərində iz, qoxu və ya zədə yoxdur;
• qablaşdırması, plombu, etiketləri və əmtəə görünüşü saxlanılıb;
• yem, qum, vitamin və digər istehlak məhsulları qablaşdırması AÇILMAMIŞ haldadır;
• məhsulun bu sifarişdə alındığı bəllidir (sifariş nömrəsi, mağazanın fiskal çeki və ya «Sifarişlərim»dəki məlumat qəbzi).

Bu halda geri aparmanın kuryer haqqını siz ödəyirsiniz.

Qəbul olunmur

• istifadə olunmuş, yuyulmuş, cızılmış, heyvanın dişlədiyi və ya qoxusu dəyişmiş məhsul;
• qablaşdırması açılmış yem, qum, vitamin, dərman və baxım vasitələri (gigiyena səbəbindən) — vaxtı keçmiş məhsul istisnadır, aşağıya baxın;
• tam dəst olmayan məhsul (qutusu, hissəsi, hədiyyəsi çatışmır);
• qanunla qaytarılmayan və dəyişdirilməyən mallar siyahısına daxil olan məhsullar.

Qaytarılan məhsul mağazada yoxlanılır. Şərtlərə uyğun gəlməsə, məhsul sizə geri göndərilir və pulu qaytarılmır. Bu halda çatdırılma haqqını da siz ödəyirsiniz.

Qüsurlu, səhv, zədəli və ya vaxtı keçmiş məhsul

Belə məhsulun dəyəri tam qaytarılır. Geri aparmanın kuryer haqqını isə, bütün qaytarma hallarında olduğu kimi, siz ödəyirsiniz. Ona görə təhvil zamanı paketi yoxlamağınızı xahiş edirik — o an görünən problemdə məhsulu qəbul etməsəniz, heç nə ödəmirsiniz. Qüsuru təhvildən sonra görmüsünüzsə, tez bizə yazın və mümkünsə şəklini göndərin. Qanunun verdiyi hüquqlar (dəyişdirmə, qüsurun aradan qaldırılması, pulun qaytarılması) bu şərtlərlə məhdudlaşdırılmır.

Son istifadə tarixi keçmiş məhsul sizə çatdırılıbsa, onu qablaşdırması açılmış olsa belə qəbul edirik və məhsulun pulunu tam qaytarırıq (kuryer haqqı sizdən tutulur). Şərt: son istifadə tarixi paketin üzərində oxunmalıdır və tarix təhvil günündən əvvəl bitmiş olmalıdır. Paketin şəklini tarix görünəcək şəkildə göndərin. Təhvildən sonra, sizdə olarkən vaxtı bitən məhsul qaytarılmır.

Necə qaytarılır

1. «Sifarişlərim» bölməsində sifarişin altındakı «Qaytarmaq istəyirəm» düyməsini basın və ya WhatsApp-a yazın. Sifariş nömrəsini və səbəbi yazın.
2. Kuryerin gəlmə vaxtını birlikdə razılaşdırırıq.
3. Məhsul mağazaya çatıb yoxlanandan sonra pul ən gec 7 gün ərzində, ödədiyiniz üsulla qaytarılır: nağd ödənişdə nağd, kartla ödənişdə həmin karta.

Qaytarılan sifarişə görə qazanılmış Bal geri alınır. Qaytarma qaydalarından dəfələrlə sui-istifadə edən hesablar üçün qaytarma imkanını məhdudlaşdıra bilərik.

7. Bal (bonus xalları)

• Hər sifarişdə məhsulların hər 1 ₼-na 1 Bal qazanırsınız.
• Növbəti sifarişlərdə hər 50 Balı 1 ₼ endirim kimi istifadə edə bilərsiniz. Bir sifarişdə nə qədər Bal istifadə oluna biləcəyi ekranda göstərilir.
• Bal pul deyil. Onu nağdlaşdırmaq və ya başqasına vermək olmur. Bal ilə promo kodu eyni sifarişdə birlikdə istifadə etmək olmur.
• Ləğv edilmiş, qaytarılmış və ya sui-istifadə ilə verilmiş sifarişlərə görə qazanılan Balı geri ala bilərik.
• Hesab silinəndə Bal balansı sıfırlanır və geri qaytarılmır.
• Arı rütbəsi ümumilikdə qazandığınız Bala görə qalxır və Bal ekranında görünür. Balı endirimə xərcləmək rütbəni aşağı salmır. Rütbə əlavə endirim və ya imtiyaz vermir.
• Bal proqramının qaydalarını dəyişə bilərik. Artıq qazanılmış Bal saxlanılır.

8. Abunəlik

Yem, qum kimi məhsullar üçün abunəlik qura bilərsiniz. Abunəlikdə hər dövr üçün ayrıca sifariş yaradılır və bu şərtlər hər birinə tətbiq olunur: ödəniş qapıda, sifariş gələndə edilir, adi çatdırılma haqqı tutulur və Bal hər sifarişə ayrıca yazılır.

• Sifariş seçdiyiniz çatdırılma günündə avtomatik yaranır (gün seçməmisinizsə — dövrün tarixində). Qiymət sifarişin yarandığı gündəki qiymətdir.
• Məhsul satışda olmasa və ya stokda qalmasa, sizə bildiriş göndəririk və bir neçə gün ərzində yenidən yoxlayırıq. Alınmasa, həmin dövr buraxılır, növbəti dövr isə adi qaydada gəlir.
• Abunəliyi istənilən vaxt «Abunəliklərim» bölməsindən pulsuz dayandıra və ya ləğv edə bilərsiniz.

9. PetAI və heyvan profili

PetAI heyvanınız barədə ümumi məlumat və istiqamət verən köməkçidir. O, baytar deyil və diaqnoz qoymur. Onun cavabları müayinəni və müalicəni əvəz etmir. Heyvanınızın vəziyyəti ciddidirsə, PetAI-ın cavabını gözləmədən dərhal baytara müraciət edin. PetAI-ın cavabına əsasən verilən qərarlara görə məsuliyyət daşımırıq.

Heyvan profili və xatırlatmalar. Profilə peyvənd, dərman, çəki və yem məlumatını özünüz yazırsınız və onun düzgünlüyünə görə özünüz cavabdehsiniz. Peyvənd, qurd və birə dərmanı üçün təklif olunan növbəti tarix ümumi tövsiyədir. Xatırlatmalar yalnız məlumat xarakterlidir və baytarınızın təyin etdiyi cədvəli əvəz etmir. «Yem bitir» hesabı torbanın çəkisinə və gündəlik miqdara görə təxminidir. Xatırlatma gecikə və ya gəlməyə bilər — vaxtı özünüz də izləyin.

Bələdçi. «Yeni heyvan sahibinə bələdçi» bölməsindəki yazılar, animasiyalar və «Bu olarmı?» (yemək, bitki və ev əşyası) siyahısı ümumi məlumatdır. Onlar hər yazının sonunda göstərilən açıq mənbələr (məsələn, ASPCA, Merck Veterinary Manual, WSAVA) əsasında hazırlanıb, lakin baytarın müayinəsini, diaqnozunu və müalicəsini əvəz etmir. Heyvanlar fərdidir: siyahıda «təhlükəsiz» yazılan qida da bəzi heyvanlarda allergiya və ya mədə pozğunluğu yarada bilər. Peyvənd, dərman, sterilizasiya və qidalanma barədə qərarı baytarınızla birlikdə verin; zəhərlənmə şübhəsində dərhal baytara müraciət edin.

10. Evə baytar

Bu xidmət aktiv olduqda baytarı tətbiqdən evə çağıra bilərsiniz. Xidməti müstəqil, lisenziyalı baytarlar göstərir. Müayinənin və müalicənin nəticəsinə görə peşəkar məsuliyyəti baytar daşıyır. Qiymət çağırışdan əvvəl göstərilir və baytara ödənilir. Ödənişin çekini və ya qəbzini baytar verir.

11. İtən və tapılan heyvan elanları

• Bu bölmə pulsuz elan lövhəsidir. Elanın mətnini, şəklini və nömrəsini elan verən özü yazır və onların düzgünlüyünə görə özü cavabdehdir. Elanları əvvəlcədən yoxlamırıq.
• Mükafatı elan verən özü təklif edir. Biz bu pulu qəbul etmirik, saxlamırıq və ödənilməsinə zəmanət vermirik.
• Nömrəniz siyahıda görünmür. Onu yalnız hesabına daxil olmuş istifadəçi «Əlaqə» düyməsini basanda görür. Nömrəni görən şəxsin sonrakı davranışına nəzarət edə bilmirik.
• Elan 30 gündən sonra siyahıdan avtomatik çıxır. Qaydaları pozan və ya şikayət olunan elanı xəbərdarlıqsız gizlədə bilərik.
• Tanımadığınız adamla görüşəndə ictimai, işıqlı yer seçin və mümkünsə yanınızda kimsə olsun. Bu görüşlərin tərəfi deyilik.

12. Rəylər və reytinq

• Mağazanı yalnız ondan sifarişi çatdırılmış müştəri, baytarı isə çağırışı tamamlanmış müştəri qiymətləndirə bilər. Bir sifarişə və ya bir çağırışa bir rəy yazılır.
• Rəy 1–5 ulduz və istəyə bağlı şərhdən ibarətdir. Rəyiniz adınızla birlikdə hamıya görünür; adınızı yazmamısınızsa, «Müştəri» kimi görünür. Nömrəniz, e-poçtunuz və ünvanınız rəydə göstərilmir.
• Mağaza və ya baytar rəyinizə açıq cavab yaza bilər.
• Rəy dürüst olmalı və öz təcrübənizə əsaslanmalıdır. Təhqir, başqasının şəxsi məlumatı (nömrə, ünvan) və ya reklam olan rəyi gizlədə bilərik.
• Rəyinizin gizlədilməsini istəsəniz, bizə yazın. Hesabınızı silsəniz, rəydən adınız silinir və rəy «Müştəri» adı ilə qalır.

13. Mağazalar üçün

Zoomarketlər Petekh-də yalnız bizimlə ayrıca partnyorluq müqaviləsi bağladıqdan sonra məhsul sata bilər. Komissiya, ödəniş və digər şərtlər həmin müqavilədə yazılır. Mağaza hər sifariş üçün qanuna uyğun fiskal (e-kassa) çek verməyə borcludur. «Elektron ticarət haqqında» Qanunun 5.3-cü maddəsinə görə mağazanın rəsmi adı (fərdi sahibkarda soyadı, adı və atasının adı), VÖEN-i və ünvanı mağaza səhifəsində və məlumat qəbzində alıcılara göstərilir. Partnyor olmaq üçün WhatsApp-a yazın.

14. Qadağandır

• saxta sifariş vermək, başqasının adından və ya nömrəsi ilə hesab açmaq;
• platformanın işinə müdaxilə etmək, avtomatik vasitələrlə məlumat yığmaq, zəiflik axtarıb istifadə etmək;
• saxta elan yerləşdirmək, olmayan mükafat vəd etmək, başqasının şəklini və ya nömrəsini icazəsiz paylaşmaq;
• platformadan reklam, spam və ya kütləvi mesaj üçün istifadə etmək;
• kuryerlərə, baytarlara və digər istifadəçilərə qarşı təhqiramiz davranmaq.

Zəiflik axtarışı və avtomatik skan cəhdləri avtomatik aşkarlanır. Belə sorğu göndərən IP ünvanı müvəqqəti bloklanır.

Bu qaydaları pozan hesabı xəbərdarlıqla və ya xəbərdarlıqsız məhdudlaşdıra və ya bağlaya bilərik.

15. Məsuliyyət

• Məhsulun keyfiyyətinə, tərkibinə və son istifadə tarixinə görə onu satan mağaza cavabdehdir. Biz qüsurlu məhsulla bağlı şikayətinizi həll etməyə kömək edirik.
• Platformanın fasiləsiz işləyəcəyinə zəmanət vermirik. Texniki işlər və ya bizdən asılı olmayan səbəblərlə xidmət müvəqqəti dayana bilər.
• Qanunun icazə verdiyi həddə dolayı zərərə (məsələn, əldən çıxmış gəlirə) görə məsuliyyət daşımırıq. Bu, qanunla istehlakçıya verilən hüquqları məhdudlaşdırmır.

16. Hesabın silinməsi

Hesabınızı istənilən vaxt tətbiqdə Ayarlar → Hesabı sil bölməsindən silə bilərsiniz. Nəyin silindiyi və nəyin qanunla saxlanıldığı Hesabın silinməsi səhifəsində yazılıb.

17. Qanun və mübahisələr

Bu şərtlərə Azərbaycan Respublikasının qanunvericiliyi tətbiq olunur. Problem olsa, əvvəlcə bizə yazın. Çox vaxt məsələni tez həll edirik. Razılığa gəlinməsə, mübahisəyə Azərbaycan Respublikasının məhkəmələrində baxılır.

18. Dəyişikliklər

Bu şərtləri dəyişə bilərik. Yuxarıdakı tarix son dəyişikliyi göstərir. Əhəmiyyətli dəyişiklik olsa, tətbiqdə xəbər veririk. Dəyişiklikdən sonra platformadan istifadəni davam etdirsəniz, yeni şərtləri qəbul etmiş olursunuz.

19. Əlaqə və satıcı məlumatları

E-poçt: petekhsupport@gmail.com
WhatsApp: mesaj yazın

Məhsulu satan mağazanın rəsmi adı, VÖEN-i və ünvanı həmin mağazanın səhifəsində və sifarişin məlumat qəbzində göstərilir.

← petekh.com-a qayıt